Aha, denk ich, die hawwes doodefoo, dasses in de letzde Monate so wenich gereechent hott wie noch nie in de letzde hunnert Johrn.
Noochdem ich Gude gesaat unn mich zu dene zwaa hiegestellt hat, habb ich gefroocht: Habbt ihr zwaa dess grad von de Londwerrtschaft unn dass die Äcker in gonz Deitschlond ausgetrockent sinn?
Wie kimmsde dann doo druff?, frächt michs Kättche.
Ei, gebb ich ze Ontwort, ihr habts doch grad von de schwarze Äcker gehabbt.
Die zwaa hawwe gelacht. Honnes, hott die Paula gesaat, du bist wie moin Monn, de Karl. Der heert aach immer was, awwer nie dess was ich gesaat habb. Mir haddes nitt von de schwarze Äcker, mir haddes vom Schwarzenegger.
Ach so, saach ich. Unn was iss mett dem?
No ja, sächts Kättche, der hott doch jetz mett soine Hausoogestellte e Kind unn werrd geschiede. Ich habb immer so gern die Filme von dem geseh unn jetz dess.
Ach, moont die Paula, du konnst doch hiegucke wohie de willst, iwwerall mache die Kerle doorum mett onnern Weiwer unn benemme sich noch nitt emol. Guck doch emol de Strauß.
Der iss doch schunn long doot, saach ich.
Die Paula hott de Kopp geschittelt. Doch nitt de Fronz-Josepp, naa, der in Amerika, de Strauß-Kahn, der mett dem Zimmermädche. Die moone halt, weil se prominent sinn unn vill Geld hawwe kennde se sich alles erlauwe. Die solle doch ihr Finger bei sich losse.
Ich habb gegrinst. Beim Strauß-Kahn wars joo nitt alloo de Finger, odder?
Egal wie, moonts Kättche, dess iss de Unnergong von de Welt. Weil jeder nor mächt wassem basst, dess war frieher onnerst.
Ess sinn awwer doch nitt nor die Männer, saach ich, guck doch hie. Doo lääft e Pärche siwwe Johr sesomme, dann heirate se unn zwaa Johr später werrn se geschiede, unn doodroo sinn oft die Weiwer schuld. Weil se was Besseres gefunne hawwe.
Ach Gott, sächts Kättche, bei all dene Sache giehts joo noch. Awwer was jetz grad bassiert iss, mett dene ville Dote, dess stellt doch alles in de Schadde. Unn aach widder weechem fremdgieh.
Ei wer iss dann fremdgonge unn hott so enn Schade oogericht?, frächt die Paula unn aach ich wollts Kättche grad denooch frooche.
Ich habb gelese, sächts Kättche, dass die Kronkheit, die su vill Mensche befalle hott, dooher kimmt, weil so e Bakterie in emm Rindermaache sich mett ooner onnere von emm fremde Stomm gepaart hott. Wär die bei ihrne Leit gebliwwe, wärse nitt erumspaziert unn hätt was Besseres gesucht wär dess mette kabutte Niern unn so nitt bassiert.
Ja, moont die Paula, die Welt gieht unner. Doo dun die Rinder nitt nor so e Gas ausrülpse, was dess Klima kabutt mächt, naa, jetz lossese aach noch die Bakterie in ihrm Maache mache wasse wolle. Eiern Honnes
Kommentare