Horscht Eusch um, die junge Leut unner dreißisch spresche alles, nur koo Flerschemerisch, sondern ein absolutes akzentfreies Hochdeutsch, man könnte sagen, ein klinisch reines.
Des hot nadierlisch viele Gründe, unner annerm aach den, dass in unsere moderne Welt, viel Leut wegziehe un viel Fremme komme mit dene mer gar net Flerschemerisch babbele konn. Donn den, dass die Mundart immer als minderwerdisch gegolle hot, un Kinner seit Generatione von ihrne Eltern un Lehrer oogehalle worn sinn, „ooständisch“ also hochdeutsch zu redde. Wie‘s bassiert is, waaß isch nit. Awwer es is bassiert, un mir alle sin Zeusche, wie ein Kulturgut, nämlisch unser schee Sprooch, in ooner Generation von uns selwer ausgelöscht werd. Un do nützts aach nix mehr, wenn mer Mundartvereine gründe duut. Die, die die Mundart lerne, pflesche un weidergewe müsste, die keeme gar net, weil mer ihne net beigebracht hot, wos fer en Schatz ihrn Dialekt is. Nur mir Alde keeme, die en sowieso könne.
Es is gut, noo besser, dass es Leut gibt, wie den Honnes, un den der dehinner steckt, die so viel defer due, dass der Dialekt konserviert un vor allem dank soim geniale Schreibsystem aach mundartgerescht – die junge Dialektverweigerer saache „authentisch“ – widdergegewwe wern könnt. Falls en je jemand widdererwecke wollt.
So, lieber Honnes, seh isch die Realität. Es deet mer gut, wenn der Beitrach hier en Sturm der Entrüstung entfache deet, un e paar junge Leut sache deete, isch hätt Unrescht; aber isch hab rescht, leider.
Tragisch fer misch persönlisch is, dass mir in moin Lewe schon de zweite Dialekt wegsterbt. Der Egerländische durch fremde Gewalt, weil mer misch aus moiner Heimat geschmisse hot un jetzt der Frankforter, also aach unsern, dorsch Selbstvernichtung.
Un donn waache isch noch e Prognos. In dreißisch Johrn, wenn alle Flerschemer nur noch „Denglisch“ schwätze, weil aach des Hochdeutsche vom Englische gefresse werd, werd moi Voraussaache von heut „Flerschemerisch werd schee gewese soi“ voll oigetroffe soi, un der Honnes misst donn soiner Glosse den Titel gewe „Flerschemerisch war schee“.
Eiern Horst aus Wicker